مقاطعة آيس كريم تنتهي بـ....

مره كنت محتاجه السوق بشكل . . ناقصه عليه أغراض كثيييييره

و كلمت أمي و أختي بدري إني أبغى السوق . . فلا صار الوقت و أجت السياره يخبروني

و جتني نومه و غفيت

و لما صحيت تفاجئت إن أختي راحت بدوني . . و إيش عذر أمي صحيناك و ما رضيتي قلتي ما تبغين

يا أنا عصبت وقتها و زعلت و إنقهرت

ما صحوني . . هم عملوها حركه لأن أختي تبغى تروح مع بنت خالي و يتسوقوا على راحتهم

لأني أنا و بنت خالي ما نتوافق . . بينا مشاكل دبلوماسيه . . فإذا مشيت ما تمشي

و الصراحه حركه بايخه و زفت منهم . . خاصه إني أكثر من مره كنت أجلس بالبيت و ما أروح السوق

و أختي تروح و تاجي أكثر من البعثات الدبلوماسيه في أوقات الحرب

كانت روحي لراس أنفي . . معصبه حتى من نفسي

و لو يمر من قدامي إبليس جلدته

المهم رجعت ست الحسن و الدلال

و قامت تشرح لأمي وش أخذت و وش جابت . . بدال ما تستحي على وجهها و تنطم و هي مسويه فيني ذي الحركه

المهم ما شفتها إلا هي جايبه كيس مليان لقمته آيس كريم النوع إلي يعجبني . . يوفو

و حطته بالفريزر . . و راحت تقولي و هي مسويه إبتسامه : أخذت لك آيس كريم

دايما لما كنا نروح السوق . . لما تلاقي شيء زين تاخذ لنفسها . . و لا تعلمني أبدااا 

و ياما إشتكيت على أمي من طريقتها ذي

لأنها حقيره . . خاصه إني أعلمها بكل شيء زين ألاقيه . . و هي تحسدني و ما تعلمني

و ذي المره أخذت الآيس كريم إلي نفسي فيه . . و بدون ما أوصيها أو أطلبها

واضحه

عارفه بترجع و تلاقي عفريت قدامها

عارفه إن إلي عملته و سوته غلط و ستين غلط

و على بالها شوية آيس كريم بيخلوني أنسى عملتها السودا

و الله طنشت . . و لا عطيتها وجه و لا كلمتها و لا شيء

لأني طفحت منها . . خلااااص وصل حدي معاها 

 دايما تسوي معاي حركات حقيره كذا . . و أنسى و أتجاهل و أقول معلييييش إصبري

لكن ألحين لا و ألف لا

جابت لي حلويات لعندي النوع إلي يعجبني 

خليتها لين ما طلعت و حطيته على خزانة الغرفه

أبين إني ما أبغى شيء من طرفها أبداااا

و الله مر يوم يومين 

و أنا كل ما فتحت الفريزر أبغى شيء . . إلا و ذاك الآيس كريم بوجهي

و كأنه يقولي خذيني

يا الله . . الصبر يا رب العباد

حنا داخلين بمقاطعه . . ما ينفع

و أحاول أقاوم الإغراء 

خاصه بعد الأكل ودي أحلي بشيء . . و أتذكره . . و يا الله على ذا اليوم

و الله تقريبا صبرت يومين . . الصـمود بوجـه الإغراء

و بالأخير أخذت واحد بالسر . . بدون ما يحس أحد (( المهمه المستحـيله ))

و أكلته بسرعه . . لأني مبينه لأختي إني ما راح آخذ شيء جابته

و كنت أعاملها معامله بحياتها ما تنساها

زبطت الباقي . . على أساس لسا كاملين

و رجـعت مكاني و كأن شيء لم يحـدث

اليوم الثاني . . و نفسي في واحـد ثاني 

بداية الإدمان تبدأ بأول قطعه

و الله ما قاومت . . و أخذت الثاني . . و رحت أزبط الباقي حتى أبين إنه ما زال زي ما هو

بعدين أخذت الثالث . . و بعده الرابع . . و رحت أرتبهم حتى يبين إنهم لسا كثار

و أخذت الخامس . . و . . .

و ما عاد نفع التغطيه . . مهما زبطتها يبين إنه قليل

و عارفه ما راح أوقف و هو لسا موجود

فأصدرت فتوى جديده . . حتى أبرر لنفسي كسري للمقاطعه

قلت من حقي إني آخذه . . حق حقارتها و قعدتي بالبيت و إني ما رحت السوق

لو الآيس كريم تبعها يعجبني . . كنت أكلته هو بعد حتى أحرق قلبها زي ما عملت هي معي

و هكذا أكملت على البقيه بقلب راضي . . إنه حق من حقوقي حتى أقهرها زي ما قهرتني

خاصه إني خلصتهم . . و لسا معاملتي معاها سيئه . . حتى تتأدب و ما تسوي ذي الحركه معي مره ثانيه

على قولة إخوانا المصريين . . إحلق للقرعا . . تخاف منك أم الشعور

و سلامتكم ^ ^