كان مشوار . . فتحـول إلى ..... ؟!!!!

يعني البدايه غريبه جدا جدا

 

أنا ألحين و أنا أكتب الكلمات مذهوله . . لأنه ما كان لا على بال و لا خاطر

 

قـررت أمي إنها تروح لعند خالي حتى تسولف معاهم

الطريق لبيت خالي صعب شويه

فـما نخـليها تمـشي إلا وحـده مـعاها يا أنـا يا أخـتي 

بيـوت أفـراد العائـله قـريب (( بينا و بينهم شارع  ))

 

كان أخـتي أكـثر وحـده تمـشي مـعاها إذا المشـوار لعـند خالي ذا لأنها تجـلس مع بنـته و تسولف

جـوهم إنـمي . . و أنـا مو من محـبي الإنـمي

 

بس كانت نايمه 

 

بالطبع أمـي الله يهديها عنـدها عـاده سيـئه

تجهز و تروح من غير ما تقـول لأحـد

تعبت نفسيا من كثر ما أقـولها لا عـاد تمـشين لحـالك قولـي لوحـده مـنا و بنوصـلك

لـكن ما عندها إلا ما راح يصير لي شيء

 

المهم إني جهزت بسرعه و مشـيت معها

 

و لما قربنا من بيت خالي شفنا جدي و هو جالس على كرسي عند مدخل بيته . . البيـوت قريـبه من بعض

 

فسلام و أخبارك و . . .

 

إلا هو يقول تعالوا أبغاكم في موضوع مهم يخصكم

 

أيـــــــــواه . . ما أدري ليش سبحـان الله حسيت إنه يخصني أنـا بالتحـديد

 

يعني ما أدري هل السبب مهارتي في قراءة لغة الجسد و الملامح و نبرة الصوت و نظـرات العـيون

(( أيوه ماهره فيها لدرجـة إن العالم صاروا يسـولفون معي بتخوف إني أطلع على أفكارهم و خـباياها . . سيء ))

 

أو إنه مجرد حدس فقط

 

أو إيش بالضبط

 

المهم إني كنت أحاول أشيل فكرة إن الموضوع يخصني من بالي . . فرحت أقول لأمي أكيد الموضوع يخـص أرضنا . . و أقصد الأرض إلي ساكنين عليها مع ملحقاتها

(( صارت مشاكل بشأنها . . و محـاولات إحـتلال . . من جـد ))

 

فراحـت أمي تسكتني و حـنا نقـرب من جـدي إلي تفاجـئت إنه قـام و دخـل غرفته

 

لا و الله الوضع كبير و أكيد يخـصني

 

و لأني مهووسة قرايه . . مهـووسه بشـكل حـتى نشـرة الدواء كـنت أقـراها و أنا صغـيره

فشـفت مطـويات إعـلان إفتـتاح مركز تجـاري و حـنا ندخل على الدرج

فأخـذت وحـده . . و إنتظرت لين ما صرنا في الغرفه . . و رحـت أتفـرج علـيها

 

و الله جـدي راح يقول إنه كان مع واحـد عرفت من إسمه إنه من نفس سلالتنا

(( عائلتي من جهة أبوي ))

 

و كانوا سوالـف و كذا . . لما قاله إن قريـبه طلب منه إنه يدور له على بنت

 

أنا وقتها وقفت مطالعه

 

أساسا ما وقفت . . تصنمت . . تجمدت

بس رفعت عيوني عن المطويه لمقدار 5 سم و تجمدت

 

و الله كنت عارفه إنه يخـصني

 

حـاولت أسوي نفسي عادي و أكمل مطالعه . . بس ما عاد عرفـت وش إلي أشـوفه و أنا أنصت لجـدي و كل أملي إنه يقـول لأمي الرجـال يبي وحـده من بناتك

يعني تفرق شويه

حـتى وقـتها أتجـنب الحـرج و أقـولها على طول خـلاص كلـمي أخـتي

 

و الله جـدي راح يسرد مزحـه على الرجل و سؤاله عن إلي بيخـطب و وش يشتـغل و و و . . .

 

الأسئله المعـتاده

 

و في النـهايه قال إن ذاك الآدمـي قاله شـوف روح (( إسمي بالمدونه مو الحقيقي طبعا ))

 

شوف روح و قلها عن الموضوع

 

أنا هنا وضعية المزهريه

شفتم تشاندلر حلقة الشاطئ يوم جوي قال ..........

الشرح بيـطول فذا المقطع 

 

وضع تشانـدر وهو جالس على الكنـبه . . نفس وضعي تـماما وقـتها

كان على بالي . . بل آمل إنه يقـول شوف بنات فلانه إذا وحده منهم بتوافق

يعني الأثر عليه بيكون أخـف . . بس على طول أنا . . و قـدام جـدي . . و الله حـرج

بتـشوفون إن الموضـوع عـادي فلـيش الحـرج

المحـرج إن أنـا رديـت كثـيرين . . و أغـلبه خـطبوني من جـدي

و مـع إنـي قـلته أنـا ما أفـكر بالزواج . . الزواج مسـؤوليه حـياه مخـتلفه قـبل مـا يـكون مجـرد قـرار

يعـني أعطيته خـبر . . وهـو الله يهـديه لـسا عـنده أمـل إنـي بأغـير رايي

فأيـوه محـرج و من جـد

 

أنا تلـقائيا وقـتها رفـعت نظري لـه و قلت له why me

 

أيوه جبت العيد بقوه يا فشـلي فشـلاااااه 

خاصه إنه ما يدري وش قلت له . . أسـأله إنجـليزي إنخـبلت رسـمي

بس أحسن الحمد لله

 

و إلي زاد الطين بله أمي إلي قالت له هاذي روح تسمعك

 

و على طول ناظـروني إثنـينهم منتـظرين جـواب

 

من جـدكم أجـاوب ألحـين و كل ذي العـيون تراقبني

لو بأموت و أتشـهد ما قدرت أنطقها من نظرات الترقب ذي

 

الحـمد لله إن جـدي تكلم على طول و راح يقـول أنا ودي إنها تتـزوج و تعـيش حـياتها و ذي السوالف إلي يرددونها

 

بس المصيبه إنه راح يقول إنه راح يكلم قريبي عشان يجـيب الرجال و نناظـره

 

جـدي . . ذا آدمي مو تيـس نناظره . . و بعدين المناظره ذي تصير إذا البنت وافـقة و قـررت الخـطبه

 

وقـتها تصير المناظره و ذي السوالف . . أما مـناظره من ألحـين

 

خـاصه إنـهم ما فـكروا في سالـفة تفـكر أول . . على طول أقول رايي و يجـيب هو الرجـال

على بالكم قلت له كذا . . ههههاي . . أكون مجـنونه (( صح فاصله . . بس مو لذا الحد ))

 

قلتها في نفسي و أنا أطالع المطويه (( ربي أرسلها في طريقي عشان تسلك لي الوضع ))

 

المهم إنهم رجـعوا إلى نظرة الترقـب لي و كل واحد يقـول ذا قـرارها ذا قرارها 

قسم كأنه قرار أمه كامله

 

قلت له بأفـكر أول و بعدين . . .

 

و جـت الصدمه الثانيه . . كانت في جـدي إلي بان عليه إنه إنصدم من جـوابي . . خـلاني أحـس إني أخـطئت خـطيئه كبـيره يوم قلـتها

كان متوقع أقوله خلاص قول للرجال ياجي

 

حـلوه قوله ياجـي كذا على طول . . يعني من غير تفـكير و لا شيء . . لازم يكون للوحـده قيمه و قدر

صـح ما أبـغى أتـزوج . . بـس برضـو لازم كـذا فتـره عـشان البريستيج 

 

المـهم جـدي راح يقول خـلاص فـكري و إستخـيري و ما أدري إيش

 

و إن شاء الله يتم نصيبك . . يا إحـليلك يا جـدي (( بتعرفون ليش قلتها في النهايه ))

 

إلي أزعجني إنه رجـع لخطبتي القديمه و إلي صارت و أنا مراهقه (( يعني ما في مخ ))

لو صارت ألحين مستحيل كنت أوافق

 

قال إن خـطيبي القديم مقـهور منه و ما أدري إيش مع إنه هو إلي تركني بإرادته بعد ما أقنعوه الناس

(( يقصد مجـموعه من أهله كانوا رافضين إرتباطنا بسبب خـلافات و إنـنا مو من نفـس القبـيله و ذي الخـرابيط ))

 

طيب وش دخـل سالفته بسالفتي ألحـين . . هو خـطب وحـده . . و أبوها رفـضه و قاله (( كلام برد قلبي و الله )) قاله دام تركت بنت فلان (( قصده حضرتنا . . كان يعرف أبوي الله يرحمه )) . . فما لك عندي بـنات

و فعلا مع إن البنت كانت تبغاه بس أبوها رفـضه رفض تام

عارف إنـه مو كـفو زواج و بيـت . . لأنه هو و أهـله كانوا يبـغون يسـوون عـرس و أعـيش مـعاهم مع إن شرطي من البـدايه يتـوظف و يدبـر بيـت لـنا (( إيـه خـبال المراهقه وافقت عليه وهو بدون وظيفه حتى))

و في النهايه رجع هو لبنت عمه إلي صدقـت نفـسها إنها الفائزه بالغنيمه

و الله حالها يشفق . . طوال الوقت و هي قدامه و ما فكر أبدا حتى إنه يخلي إخته تكلمها و لو كلام

و ما فكر فيها إلا بعد ما خطبني و حاول يخطب بنت ثانيه و يأس من الناس إلي ما شافوا فيه الزوج الصالح لبناتهم فإضطر يرجع لها

و لا بعد حـاليا هي إلي تصرف على البـيت . . تشتغل و تصرف عليه هو و عيالهم

يعـني الله فـكني مـنه يـوم إنه إنقـلع . . شر و ذلف

و جدي مكمل الله يهـديه . . قال شيء أزعجني

قال إن الموضوع باقي حـرقه في قلبه (( قصده بخـطيب الغفله السابق ))

 

سألته و أنا وجهي مثل angry bird's : أي موضوع

 

حسيت إن جدي غير كلامه . . لأنه نزل عيونه ثواني . . و هو يسويها لما يفـكر و قال فلوس المهر

 

أساسا ما دفع إلا عشره آلاف بس . . كان لي عندهم 30 ألف و تركتها بعد ما طلـبني جدي أخـليها قال إن أبـوه مسـكين ما راح يقـدر يدفـعه

 

و هي لي بما إنه هو إلي طلب الإنفصال و دفـعها أبـوه . . فكيف تكون في قلبه

 

و بعدها فكرت . . هو يقصد الفلوس أو أنا

هنا حسيت بعصبيه . . وش له يفكر فيني . . هو إلي ترك و صار متزوج . . فوش له يفكر فيني . . عمى

أيـوه خـطبني لأنه فعلا كان يبغاني له

مو مثل الثانيه و لا بنت عمه إلا أخذها لأن و لا وحده تقبل برجل مو ثقه و لا كفو مسؤوليه

خطبني لنفسي شخصيتي لروحي

و شكله يوم فكر ننفصل على باله بأتراجع و أقبل بكلامه

وقتها و الله إني فرحت يوم جت منه حتى ما أضطر أرجع له الذهب و بقية المهر لأني فعلا ندمت على الموافقه على الزواج

و مدري وش بمخي يوم وافقت . . و الحمد لله إنتهت على خطبه لأن إنفصالها أسهل و أسرع

و لما طمر للبنت الثانيه كان فاكر  إنهم بيوافقون عليه و من ناحيه يبين أخذت غيرك

أخذ فعلا . . الثالثه هههههه

ثنتين رفضوه

ففعليا ما له أي حق يفكر فيني

 

ما صدقت على الله إن أمي تمشي من عند جـدي إلي ظل يقول النصيب من الله و إن شاء الله تردي خبر و نجـيب الرجال و . . .

 

جـدي ما عرفني كل هالسنوات . . أو لسا عنده أمل . . .

 

أنا صحـيح طلبت التفـكير . . بس عشان شيء واحد بس

 

حتى يفـكروا الناس إني كنت أفكر في الزواج . . بس بعدها هونت

 

إني كنت أفكر أوافق على الرجال . . بس بعدها غيرت رأيي

 

عشان يشيلوا من بالهم فكرة إني ما أبغى أتزوج بسبب الخطبه الفاشله . . .

 

صحيح إني إنصدمت منه . . بسبب إني إعتقدت إن إلي بينا حب

و إنه مو زي بقيت حالات الخطبه و الزواج الثانيه و إلي هي زواج تقليدي و يكون الحب بعد الزواج

 

لأننا كنا نعرف بعض من و حنا أطفال . . عشنا طفولتنا سوا و إفترقنا بعد ما كبرنا

و هاذي هي الصدمه . . .

شخص عرفته من طفولتك تكتشف إنه أناني . . أناني إنه ما يهتم لا مسؤوليه و ما يهتم لمشاعر البنت (( لأنه جرحني أكثر من مره و من هنا عرفت إن ذا الآدمي مو مناسب لي ))

 

أما حكاية إني ما أبغى أتزوج بسببه فلا و الله . . من هو حتى أوقف شيء عشانه أو بسببه

 

ما أبغى أتزوج لأني شفت معنى الزواج الحقيقي . . معنى الإرتباط بشخص و تأسيس حياه و كل ذي الدوخه

 

و في النهايه ينقال لك إنتي ما لك راي . . و إنتي زوجه و بس . . و أنا رجال البيت

 

يعني بالعربي الفصيح بسبب عنصر الشرقيه في رجالنا و نظرتهم للمرأه

 

و أنا عندي أموت مئة موته . . و لا أسلم رقبتي لرجال يتأمر عليه و ينظر لي بدونيه لأنه تربى على معتقد أن الحياه هي أن يقود الرجل المرأه و ليس يتشاركا الحياه و يعيشانها بالتفاهم و الإنسجام

 

بالطبع إنتظرت يوم . . و بعدها قلت لأمي كلمي جدي و قولي له الرجال ما ينعاب أبد و إنه زين دام ذي أخلاقه . . بس أنا ما أفكر في الزواج و مو مستعده لتأسيس حياه مع إنسان

 

لأن الزواج مو حفله و زفه و مبارك عرس الإثنين و هدايا و سفر . . زواج تأسيس حياه مع الطرف الثاني و تربية جيل . . لازم الواحد يكون مستعد حتى يقرر دخولها

جدي .............

ما تقبل الموضوع بشكل جيد

ما حاول يفكر إن فيه سبب بالآدمي خلاني أرفض

و خلص إلى سالفة إنه يمكن لأنه أكبر مني شويه

الله يعافيه أنا حتى ما كنت أعرف كم عمره . . و الله جدي يضحك الله يسعده

 

و ألحين بأقول ليش قلت من حسن حظ أختي إنها ما راحت هي . . .

 

لأنها هي ودها تتزوج . . ودها تأسس حياه و تعيش برومنسيه مع زوجها (( حالمه جدا ))  و يكون عندها عيال . . .

 

بس أمي مشكلتها مدلـله أخـتي دلال لا صار و إلى إسـتوى على قولة الكويتيين

صارت في التدلـيل و دائما تقول إنها مريضه لو ما فيها إلا زكام أو صداع . . .

 

فصار العالم كله يعتقد إن أختي عندها مرض مزمن . . و هي لا بخير و لا فـيها شيء . . .

 

فلما جدي قالي عن الخطبه . . قال أختها مسكينه مريضه . . فما في إلا روح . . .

 

تخيلوا ردة فعلها و صدمتها لو سمعت هالكلام . . .

 

بس الله يعين . . .

 

هاذي هي سالفة المشوار إلي تحول بخطبه . . .

 

و إن شاء الله إنه آخر مشوار يصير فيه تحويله (( حلوه تحويله )) . . .