أزمة لايـكات مواقـع التواصـل
شحاته غريـبه عجـيبه
كل مره ينط واحد و
يشحت اللايـكات بطرق سخـيفه جـدااا
حـط لايـك على آخـر صـوره
إدعـموني بلايـكات . . خـير بتتـبرع فـيها للمحـتاجين حـتى تطـلب دعـم
يقـولك 10 لايـكات و
أردهـا دبـل
وهـو ما راح يردهـا .
. و عـارف إن إلي بيـسوي له اللايـكات راح ينشغل و ينسى الموضوع
عشان كذا يطلب قبل ما
يسويها
ممكن لايكات . . كأنه يطلب سلف . . عاد السـلف حـتى يشتري شيء مفيد
اللايـكات عشان إيش . . يجـدد فيها مخـه
التصـفيه . . إلي يبغى أظل أتابعه يحـط لايـك . . و تلقاه مرسلـها
للكل . . أي أحـد يطلع حـسابه بالصدفه قدامه حتى لو ما يعرفه و لا يتابعه أصلا
المهم يحـصل لايـكات
أحـس بعدين بتعلن أمريـكا عن مرورها بأزمة اللايـك . . و تتوقع إنخفاض
شديد في نسـبة اللايـك هاذ الشهر . . و قد تستمر لمدة 4 أشهر . . قبل أن يعـود
لللإنتـعاش حـسب توقـعات خـبراء اللايـك
من كثر ما هو مسوين له أهمـيه . . أحسه صار سوق أسهم مو موقع تواصل
ودي أعرف و أفهم
هي اللايـكات بتتحـول لفلوس
بتتحـول إلى عملة بتكويـن الشهـيره
أو تنـهمر علـيه الهـللات الذهـبيه وهـو فرحـان و فاتـح فمه و ضروسـه
طالعه ببلاهه و كأنه سعـيدان في طـاش
أو تصـير زي نقـاط قـطاف . . يحـولها لدقـايق مكالمات أو بـيانات
للنـت
تجـيب له تذكرة طايره لدبي أو أمريـكا
تجـيب له زوجه مغربيه . . أو لها زوج فرنسي
تظهر له شخـصيه مشـهوره
أو إذا وصلت اللايـكات لعدد معـين تتحـول إلى مصباح علاء الدين . . و
يطـلع لك المارد بصلعته تلمع تقول البلوره السحريه حـتى يحقق أسمج أمنـياتك
شيء مفـيد حتى يصـير عليها ذا الطـلب الجـنوني
شيء زين . . شيء يستاهل كل ذا الهـبال عليها
بالطبع و حـتما و أكـيد . . لا
لا و ألف لا
600 ملـيون لا . . ملـيار لا . . ترلـيون لا
آخر عدد بالعالم على قولة ولد خالي لا
وش طاعون أمكم مع اللايـكات طيب
وش طاعون هوسكم باللايـكات جـعلها تخـتفي للأبـد
يعـني ناقصين جـرعة حـب و علامة اللايظ يعطيكم جرعه منه
و إلا فاقدين إهتمام . . و إذا أحد حط لايك تنتعشون
كل شوي ممكن لايـكات . . و لايـكات و أردها . . و أم العـفاريت و
أبوها و جـدها
(( العـذر و السموحـه يا العـفاريت . . بس جـننوني ))
طاحـت هيـبة اللايـك خـلاص . . ما عاد له قـيمه و لا كرامه
صار عنده إكتـئاب مزمن . . و ألحـين يتعالج بالصدمـات الكهربائيه
((
عارفه ألحين البعض يقولون جعله لي . . و الله مو أنا إلي عقلها بنص لايك ))
قبل ذي المسخره كان له قيمه . . لما أحد يحـط لايك على شيء كتبته
أتحـمس و أفكر حـط اللايـك لأني كتبت شيء زين
ألحـين الواحـد يسرد لي لايـكات من أول مشاركه لـين آخره . . و ينتظر
بلهفه متى يشوف رد عشان يحـط لايـك
كذا ماسك الجـوال و عـيونه تقول فناجـيل وهو يطالع و يسوي تحـديث كل 5
ثواني . . بالطبع عشان أردها له . . يعني مصالح متبادله
ما لها قيمه أبدااا و لا معـنى
و إلا بالله . . كل إلي كتبته و نزلته عجـبه
لأنه ما حـطها لشيء أنا قدمته . . حـطها حتى أردها له . . فوش الفايده
أحس اللايكات مخدرات
الواحد يحك جسمه و يمسح أنفسه و شكله زفت . .
يعني مدمن
و جالس يحوس في جواله وهو يتنافض و يرتعش يدور حساب يشحت منه لايكات
. . لايك واحد بس حق الإدمان . . بس واحد .. حق المزاج
و أول ما يلاقي واحد يرضى . . و يشوف أول لايك يظهر . . خلاص يرتاح
ظهر مخدر اللايك و أعطى مفعوله . . وقتها يسترخي و يمد رجوله . . و ذيك
الإبتسامه على فيسه وهو يشوف الذباب جمال بعد ما عدل المزاج
و الله مو حق مواقع تواصل إنتم
عندنا مثل يقول . . أعوذ بالله من الغبي إذا تحضر . . يعني عاش شيء
متحضر و عصري
ما كنت مستوعبه المثل صح حتى شفت مدمني اللايكات و المقلدين . . بعدها
إستوعبت . . و عن جد صح
ذي المفهوميه تطلع من تحت أظافرهم و من خشومهم و من على أذانهم
يعني المفهوميه و التحضر و العصريه تطيح منهم زي المطر
يعني الناس يتسلفوا و يغرفوا من بحر المفهوميه العميقه في الغباء
و الله مو وجه تحضر و تكنولوجيا
ما أدري إنتم من أي نوع . . العاديين . . إلي مثلي . . و إلي من جماعة
مدمني اللايكات
تعليقات
إرسال تعليق