دراما كوين
كلنا نعرف مصطلح دراما كوين
إلي تسوي ضجه و صيحه و زيطه و زنبليطه . . على ولا شيء
هي شبيهة النفسيه . . بس ذي صياح و نياح و . . يعني دراما
أنا بحياتي دراما كوين . . أختي
يا الله قد إيش هي دراميه و تعشق الدراما في حياتها و تسويها بكل شيء
أوقات أشك إني يمكن غير مباليه شويه . . يمكن شخصيتي قويه حبتين عشان كذا أشوفها مبالغه
لكن حقيقة كذا أووووفر
قبل أكثر من سنه طاح شيء على إصبعها . . و لييين اليوم رافعه إصبعها كأنه راية التوحـيد
ناس تنكسر إيدهم و رجلهم . . و بعد شهرين ثلاثه يتحركوا . . و ذي ضربه حتى ما فيه كسر
أدنى خدش تصيح و تنـوح و تـأوه طوووووول الوقت
و تظل مغطيتها بلاصق الجروح أيام و أحيانا توصل أسابيع
أمس سمعتها و هي تردد و تكرر إنجرحت . . و الله إنجرحت . . و ما عاد وقفت
مع إني أعرفها دراميتها . . بس قلت يمكن جرح دامي . . يعني سكين مشرط
يعـني شيء فعلا مؤلم
لما ناظـرت لـه حسيت ودي أعطيها كف
ذي الدراما . . على نقطه عند ظفرها
مو ياجي جلد منسلخ عند الظفر صغير . . لما تشيله تاجي مكانه نقطه حمرا
زيه تماما . . يعني حتى ما ياجي نص سنتيمتر . . يا الله يا الله ياجي ملي
ظليت أناظر و أنا ساكته و هي تتأوه و تتألم بشكل لا إله إلا الله
و ليته كذا و بس . . إلا جابت لاصق جروح و راحت تغطيه و . . .
سلام قول من رب رحيم
أنا مره جرح إبهام يدي . . مر عليه أكثر من 3 سنوات . . و لين اليوم علامته موجوده على إصبعي
إنسلخ الجلد تقريبا بطول إبهامي من عنـد المفـصل لـين نـص الظفـر
جرحتني أداة تجويف الفواكه
حطيت إبـهامي فيـها حـتى أطـلع بـقايا الفاكـهه منـها
و أنـا أضـغط طلـعت البـقايا و دخـل إبـهامي بقـوه فيـها
أطالـع إلا الجـلد بـرا فـوق الأداه ذيـك
و عااااادي . . رشيت عليها بمويه . . و غطيتها بمنديل حتى كملت تحضير الفواكه لأمي . . و أخذته لها
و بعد ما خلصت خبرتها حتى تقطع بقيت القطعه إلي لساتها موصوله بإصبعي . . و ما رضت إقشعرت منها يـوم شافـتها
رجعت قصيته و لفيت عليه لاصق مدت يوم أو يومين
بعدها خلاص
لا تأوهت . . و لا شيء
مو شيء مررررره يستاهل التأوه و الدراما
أيوه أتألم في ذيك اللحظه وقت الجرح . . بس ثواني و خلاص
المشكله إلي خلاها حساسه كذا بالمره هي أمي
كانت تدلعها و تدللها و لا يصير معاها و لا تنصاب و لا تضربوها و لا تطيح و لا و لا
من و إحنا صغار
عشان كذا طلعت دراميه لذا الحد
مره خبرتها . . أصبري و إحتسبي (( على أساس موت ^ ^ ))
يعني مو على كل شيء و أي شيء دراما و ألم و نياح
قلبت عليه قلبه أعوذ بالله . . و خبرت أمي إلي عصبت عليه و قالت أنا قاسيه و مدري إيش
طيب . . نشوف
بالأخير أمي لاحظت دراميتها . . فبررت الوضع إنه أجسادنا تختلف
فيه ناس قويه و تتحمل . . و ناس ضعيفه ما تتحمل
إخـتلاف . . إخـلاااااااااف
و الله إلا دلع مبالغ فيه و أووووفر كثير
الصـبر بـس
إنتم . . فيه بحـياتكم دراما كوين
تعليقات
إرسال تعليق